Лъэпкъ гъуазджэм зи цIэр дыщэ хьэрфкIэ хатха, КъБР-м и цIыхубэ усакIуэ, УФ-м щэнхабзэмкIэ щIыхь зиIэ и лэжьакIуэ IутIыж Борис псэужамэ мы махуэхэм и ныбжьыр илъэс 85-рэ ирикъунут.
IутIыж Борис и къалэмыпэм къыщIэкIащ усэ купщIафIэхэр, новеллэ гъэщIэгъуэнхэр, гупсысэ кIэщI хьэлэмэтхэр, гушыIэ, ауан зыхэлъ тхыгъэ шэрыуэхэр, пародиехэр, эпиграммэхэр, анэдэлъхубзэм, литературэм, театрым ятеухуа публицистическэ тхыгъэхэр, сабийхэм яхуитха усэ гъэщIэгъуэнхэр. Ауэ Борис нэхъ къызэрацIыхуу щытар,IутIыж Борис шэч хэмылъу, драматургыущ, цIэрыIуэ нэхъ зыщIари и пьесэ купщIафIэхэрщ. Пьесэу 30-м нэс итхащ IутIыжым. Ахэр: «Тыргъэтауэ», «Дамэлей», «Эдип», «Мазагъуэ», «Нартхэ я дыгъэ», «Шамхьун и фызышэ», «Гуащэмыдэ хьэблэ», «ГушыIэ махуэ апщий!», «Дунейр театрщ», нэгъуэщIхэри.
Утыж Борис Дунейпсо Адыгэ Хасэм и къызэгъэпэщакӀуэхэм ящыщщ. Дунейпсо Адыгэ Хасэм и 6-нэ конгресс 2003 гъэм шыщхьэӀум и 17-18-хэм Налшык щекӀуэкӀам Борис ДАХ-м и вице-президенту хахащ. Ар Дунейпсо Адыгэ Хасэм и гимным и авторщ.
Борис уэсяту адыгэхэм къытхуигъэнащ: -Щыфхъумэ фи унагъуэхэм адыгэбзэр! Дызэвгъэпсалъэ адыгэхэр адыгэбзэкIэ!
Ди хэкум исхэми хэхэсхэми адыгэ псоми зы зытщIын щхьэкIэ Iущыгъэ зэрытхэлъынум къыхуезыджэ сонет иIэщ IутIыж Борис.
«…ФIыкъым тхыдэтегъэр, ауэ нэгу щIэкIахэм
Дерс хэзымых лъэпкъыр кIуэуэрэ мэкIуэд…
Адыгэ жылакIэу дунейм щикъухьахэм
Дэ къытщIоджэ нобэ лIыхъужьыпсэ куэд:
«Маржэ хъужыхэнхэ, зыхэвгьэлъ ди лIыгъэр!
Ауэ лIыгъэм япэ ирырещ Iущыгъэр!»
