Жэпуэгъуэм и 6-м Налшык къалэм щекIуэкIащ ЩIэныгъэхэмкIэ Дунейпсо Адыгэ академием и президиумым и зэIущIэ. Абы щIэныгъэлIхэр щыхэплъэжащ 2023 гъэм и блэкIа мазибгъум къриубыдэу ялэжьамрэ иджыри нащIысыну къапэщылъымрэ.
Зи гугъу тщIам тепсэлъыхьащ ЩIДАА-м и щIэныгъэ секретарь нэхъыщхьэ Щхьэгъэпсо Сэфарбий:
— Илъэсыр щыщIидзэм щыгъуэ Адыгэ академием илэжьын хуейуэ дубзыхуауэ щыта псори и чэзум зэфIэдгъэхьауэ, зыхуэдгъэувыжа къалэнхэр дгъэзэщIауэ жыпIэ хъунущ. Псом хуэмыдэу къыхэзгъэщыну сыхуейт «Зи хуэдэ щымыIэ уэщIкъэхъугъэ щэнхабзэ» жыхуиIэу мэкъуауэгъуэм и I4-м Налшык къалэм щедгъэкIуэкIа зэIущIэр жылагъуэм ягу зэрыдыхьар, абы щIэупщIэ зэриIар. КъищIынэмыщIауэ, Гуманитар къэхутэныгъэхэмкIэ Адыгэ Республикэм и институтым щIыгъуу едгъэкIуэкIат зэманыщIэм къыздихьа технологиехэм я лъэхъэнэм анэдэлъхубзэр хъума зэрыхъунум дыщытепсэлъыхьа дунейпсо щIэныгъэ зэIущIэшхуэ. Ди щIэныгъэлIхэр зэпымычу хэтащ Шэшэн Республикэм, Якутием я щIэныгъэ академиехэм къызэрагъэпэща зэIущIэхэм, урысейпсо, дунейпсо щIэныгъэ конференцхэм. Пэжщ, гуныкъуэгъуэ гуэрхэри щыIащ «ЩIДАА-м и докладхэр» журналым и къыдэкIыгъуэхэр къызэгъэпэщыным теухуауэ. Ауэ псори зэхуэдгъэхъужащ, журналхэри и пIалъэм къыдэдгъэкIыфащ.
Щхьэгъэпсом гулъытэ щхьэхуэ хуищIащ «Адыгэхэр» монографиер къызэрыдэкIамрэ ар гъэхьэзырынымкIэ Адыгэ академием иригъэкIуэкIа лэжьыгъэшхуэмрэ. Къыхэгъэщыпхъэщ адыгэм ехьэлIауэ тхыдэм къыхэнэжа дэфтэрхэр щызэхуэхьэсыжа «Малая Шапсугия» тхылъым Половинкинэ Тамарэ (АР-м, КъБР-м щэнхабзэмкIэ щIыхь зиIэ я лэжьакIуэ – Ф.А.) щелэжьым ЩIДАА-м абы зэрызыщIигъэкъуар, «Свет светильников в истории черкесов» тхыгъэр зэдзэкIыным зэрыхэлIыфIыхьар. КъищынэмыщIауэ, Щхьэгъэпсор тепсэлъыхьащ 2023 гъэр имыкI щIыкIэ зэфIахын хуейуэ къапэщылъ лэжьыгъэм.
ЗэIущIэм къыщаIэтащ «ЩIДАА-м и докладхэр» журналым игъуэта зэхъуэкIыныгъэхэр, академием хэтхэм ялэжьхэр къызэрапщытар, илъэсым и кIэм академием и унафэщIхэр иджыри зэ зэхуэсу ялэжьам ириплъэжын зэрыхуейр.
— УФ-м Егъэджэныгъэмрэ щIэныгъэмкIэ и министерствэм деж щыIэ Аттестационнэ комиссэ нэхъыщхьэм (ВАК) и къыдэкIыгъуэхэм «ЩIДАА-м и докладхэр» хагъэхьэну дыхущIокъу. Абы къыхэкIыу академием хэтхэр фыкъыхуезджэну сыхуейт ди журналым нэхъ жыджэру фыхэлэжьыхьыну, щIэныгъэ IуэхущIапIэхэм я лэжьакIуэхэри мы Iуэхум къешэлIэнымкIэ сэбэп фыхъуну. Сыту жыпIэмэ, журналыр нэхъ щIэщыгъуэху и щIыхьымрэ и мыхьэнэмрэ хохъуэ! А псори къыдэхъулIэн папщIэ, журналым зедмыгъэузэщIу хъунукъым, — къыхигъэщащ Щхьэгъэпсом.
ЩIДАА-м и Президентым и чэнджэщэгъу Балахъуэ Олег къыщыпсэлъам жиIащ Адыгэ академием цIыху 309-рэ зэрыхэтыр. Абыхэм ящыщу 237-р – академикщ, 72-р член-корреспондентщ.
— Академием хэт цIыху 309-м ящыщу 53-м я тхылъхэр къыдатыххакъым, 49-м ейр хабзэм къызэригъэувым хуэдэу зэгъэпэщакъым, дэфтэр гуэрхэр къэтщ. Ар цIыхум жэуаплыныгъэ зэрыбгъэдэмылъым и нэщэнэщ икIи академием иригъэкIуэкI лэжьыгъэмрэ ди пщэ дэтлъхьэжа къалэнхэмрэ егъэнэхъыкIэ. Мы ныкъусаныгъэхэм гу лъывэзгъатэу икIэщIыпIэкIэ дгъэзэкIуэжыну сыхуейт, — жиIащ Балахъуэм.
ЗэIущIэм къыщыпсэлъащ Къэбэрдей Адыгэ Хасэм и тхьэмадэ, ЩIДАА-м и Президентым и къуэдзэ ХьэфIыцIэ Мухьэмэд. «Кто есть кто в АМАН» тхылъыр гъэхьэзырынымкIэ академием и унафэщIхэр сэбэп къыхуэхъуну, щхьэж теухуа дэфтэрхэр къызыхуэтыншэу зэхуэхьэса хъунымкIэ зыщIагъэкъуэну щIэлъэIуащ тхьэмадэр.
Щхьэгъэпсом жиIащ ЩIДАА-м 2023 гъэм иригъэкIуэкIа лэжьыгъэм щытепсэлъыхьыну зэIущIэшхуэу илъэсым и кIэм зэхашэн хуейм теухуауэ академием и президент Къанокъуэ Арсенрэ абы и къуэдзэ, Гуманитар къэхутэныгъэхэмкIэ Адыгэ Республикэм и институтым и унафэщI ЛIэужь Iэдэмрэ зэрызэпсэлъар, къаIэтыну упщIэхэр зэрагъэбелджылар.
