Социалист Лэжьыгъэм и ЛIыхъужь, РСФСР-м и Къэрал саугъэтым и лауреат, Къэбэрдей-Балъкъэрым и цIыхубэ усакIуэ, Горький Максим и цIэр зезыхьэ Къэрал саугъэтыр зыхуагъэфэща, жылагъуэ лэжьакIуэ цIэрыIуэ КIыщокъуэ Алим къыщалъхуа махуэм ирихьэлIэу, хабзэ зэрыхъуауэ бадзэуэгъуэм и 22-м, абы и фэеплъ Налшык къалэ администрацэм и гупэм къит абы и фэеплъым и деж пэкIу щекIуэкIащ.
КIыщокъуэ Алим къызэралъхурэ илъэси 109-рэ зэрырикъум теухуа пэкIум зыкърагъэхьэлIат республикэм и щэнхабзэ IуэхущIапIэхэм, министерствэхэм, жылагъуэ зэгухьэныгъэхэм я лIыкIуэхэм, ар къэзыцIыхуу щытахэм, и тхыгъэхэр фIыуэ зылъагъухэм.
Адыгэ усыгъэмрэ художественнэ прозэмрэ я зыужьыныгъэр зи цIэм къыгуэхыпIэ имыIэу епха КIыщокъуэм и япэ тхыгъэр илъэсипщI щрикъум итхат. Абы и Iэдакъэ къыщIэкIащ усэ тхылъ пщIы бжыгъэхэр, пьесэхэр, поэмэхэр, сабий усэхэр, романхэр.
— Зыщыщ лъэпкъым и цIыху нэст КIыщокъуэр. Кулиев Къайсынрэ КIыщокъуэ Алимрэ лъэпкъ зэныбжьэгъугъэм и щапхъэ дахэ щIэблэм ирагъэлъэгъуащ икIи ар я гъащIэ псом щыпхашащ, — жиIащ Дунейпсо Адыгэ Хасэм и тхьэмадэ Сэхъурокъуэ Хьэутий.
ПэкIум къыщыпсэлъащ усакIуэ Беппаев МутIэлип, Гуманитар къэхутэныгъэхэмкIэ Къэбэрдей-Балъкъэр институтым IуэрыIуатэмкIэ и секторым и унафэщI Гъут Iэдэм, тхылъ тедзапIэм и унафэщI, лъахэхутэ цIэрыIуэ Котляровэ Марие сымэ, нэгъуэщIхэри.
Сабийхэр гъэхуауэ къеджащ усакIуэм и усэхэм ящыщу ягу нэхъ дыхьэхэм ящыщхэм.
ПэкIум хэтахэм КIыщокъуэм фэеплъым удз гъэгъахэр тралъхьащ. КъыкIэлъыкIуэу, гупыж зыщIа псори яшащ усакIуэм и музей Шэджэм районым щыIэм. «Всадник чести» фильмым ирагъэплъа нэужь, КIыщокъуэ Алимрэ Кулиев Къайсынрэ я фэеплъхэм удз гъэгъахэр тралъхьащ.
