ЩэкIуэгъуэм и 24-м Къэрал концерт гъэлъэгъуапIэм щагъэпэжащ КъБР-м лъэпкъ Iуэхухэмрэ жылагъуэ проектхэмкIэ и министерствэм республикэм и хъыбарегъащIэ IэнатIэхэм я лэжьакIуэхэм папщIэ къызэригъэпэща «На исторической родине: Кабардино-Балкария – республика дружбы и согласия» зэпеуэм къыхэжаныкIа журналистхэр.
КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзор хъыбарегъащIэ IэнатIэхэм я лэжьакIуэхэм зэпеуэм ягъэхьа тхыгъэхэр зыхыхьэ лIэужьыгъуэ елъытауэ, абы щытекIуахэм министерствэм и щIыхь тхылъхэр яритыжащ, зыпэрыт IэнатIэм къащыхуэщхьэпэну саугъэтхэр щIыгъуу.
— Хамэ къэралхэм щыпсэу ди хэкуэгъухэм ящыщу адэжь Хэкум къэзыгъэзэжахэр къызэрытхэзэгъэжам, адрейхэми къагъэзэжыну къыхуезыджэ фи лэжьыгъэхэр уасэ зимыIэщ. Журналистхэм фи лэжьыгъэ щхьэпэхэм икIи лъапIэхэм я пщIэр къэлъытапхъэщ. Фызыпэрыт IэнатIэр жылагъуэр ефIэкIуэным и IуэхукIэ адэкIи къызэрывгъэсэбэпынум шэч хэлъкъым, – жиIащ КIурашын Анзор. – Зэпеуэм фызэрыхэтам папщIэ фIыщIэ фхузощI! Ди зэхьэзэхуэхэм иджыри фи зэфIэкI фыщеплъыжыну, цIыху нэхъыбэ фыхэтыну фыкъыхудоджэ. ЕтIанэгъи абы пытщэну ди мурадщ.
«Газетым къытехуа тхыгъэ нэхъыфI» зи Iэдакъэ къыщIэкIауэ къалъытар «Международный Черкесский Вестник» газетым и корреспондент Фырэ Анфисэ 3-нэ увыпIэр къыщихьащ а зэхьэзэхуэм.
